Nostalgie vir die nuwe generasie deur Spoegwolf

In die laat tagtigs het mense soos Johannes Kerkorrel albums uitgereik wat jou oë laat rek het – alternatief, tog emosiebelaaide lirieke met rou, eerlike stemwerk. En hier verskyn weer een van dáárdie albums.

Spoegwolf het in 2012 ontstaan toe die lede; Danie, Chris, Albert en Moskou saam in die Paarl op skool was. Danie en Moskou is ook broers. Danie skryf die liedjies en doen die stemwerk. Chris sorg vir die kitare, klawers en die produksie. Albert is op baskitaar, terwyl Moskou die dromme en perkussie behartig.

Hul jongste album, Die Donker Toring, is akoesties goed versorg en die liedjies bevat temas wat allerdaags is, maar wat min oor sing. Snitte met titels soos Geel, Hartaanval en Seer maak jou so nuuskierig dat jy wil spring deur die snitte en weer terugkom na waar jy was.

Hierdie album is nie net vir die jeug nie, maar beslis vir enigeen wat van rou, eerlike musiek hou. Die album het ontwikkel in ’n ateljee in Stellenbosch waarna die grootste gedeelte opgeneem is by Sunset Recording Studios deur Gurgen von Wechmar.

Hierdie nuwe groep gaan beslis onder die volk se vel inkruip. Hul tree landwyd op, maar is veral gewild in Pretoria en Potchefstroom tussen die studente.

Wanneer die laaste snit uitdoof, verstaan jy hoekom hulle ook tans benoem is vir ’n Ghoema-toekenning! Spoegwolf gaan nostalgie skep vir ’n nuwe generasie.

Loer hier na die musiekvideo van Spoegwolf – Die Donker Toring

https://www.youtube.com/user/Spoegwolf

Enjoyed this post? Share it!

 

Leave a comment